" الكبد الدهني " لو سألت 90 % من الناس يعني ايه الكبد الدهني هيقوللك " دهون على الكبد "
لا و الله 😁 بجد طب إحلف 😂😂 . و ال 10 % الباقيين هيقولوا منعرفش و دول المحترمين بزيادة يعني عكس الفتايين اللي فوق 🙈 .
طيب نشرح هنا بقى معنى الكبد الدهني بتفصيل معقول علشان كلنا نفهم و نستفيد .
تعريفه إيه : - قلنا قبل كده للي متابع معانا من زمان إن من ضمن وظايف العضو الخارق اللي هو الكبد إنه مسئول عن التمثيل الغذائي للدهون يعني حرقها للإستفادة منها عند الحاجة و بيطلع نتيجة العملية دي الدهون الثلاثية و الكولستيرول و الأحماض الدهنية .
فلما بتزيد الدهون دي لحد أكتر بكتير من الطبيعي أو بيكون فيه خلل في الوظيفة دي في الكبد و يفشل الكبد في التخلص من هذا الكم الهائل من الدهون الثلاثية و الأحماض الدهنية بتبدأ تترسب في الكبد جوا الخلايا السداسية الشكل العظيمة بتاعة الكبد و تبقى عاملة زي الإنسان التختوخ اللي وزنه 200 كيلو و طوله 170 سم يعني فيل صغير ما شاء الله مبتقدرش تتحرك و لا تقوم بالوظايف المطلوبة منها اللي على المدى البعيد بيعمل مشاكل هنتكلم عنها بالتفصيل .
طيب إيه أسبابه البتاع ده :-
أسباب كتير جدا جدا أولها العادات الغذائية السيئة - اللي بنتكلم عنها كل مرة بالمناسبة - و في الآخر بتروحوا تضربوا الفتة و تسيبوني 😂😂 .
الدهون و المسبكات و المقليات و الحاجات استغفر الله العظيم الجميلة دي هيا السبب لأنها بتسبب سمنة مفرطة و زيادة تراكم الدهون في منطقة البطن و بالتالي بيبقى الإنسان عرضة أكتر للتدهن الكبدي .
تاني حاجة مرض السكر من النوع الثاني :-
من أكتر الأسباب شيوعا للكبد الدهني لأن في مرض السكر زي ما بيبقى فيه خلل في مستوى السكر بالدم بيكون بردو فيه خلل في مستوى الدهون و التمثيل الغذائي ليها في جسم المريض .
ثالثا :- مقاومة الجسم للإنسولين أو insulin resistence و دي من أهم أسبابها السمنة كمان .
رابعا :- نقص هرمون الغدة الدرقية بيبقى فيه خلل و زيادة في الدهون و الكولستيرول في الدم و زيها بالظبط الخلل في هرمون الغدة النخامية - دي اللي في المخ آه لو بتشبه عليها يعني - 😊 .
طيب دي الأسباب اللي بيزيد معاهها دهون الكبد . هل بقى لازم يعمل مشاكل او لازم يقلب بتليف بالكبد ؟ تعالوا نعرف مع بعض .
البداية في الحقيقة كانت في أوروبا و الدول المتقدمة انهم بيعملوا أبحاث كالعادة لأنهم " ياااااااي 🙈🙉🙊 " بيهتموا بالبحث العلمي و عندهم فراغ كده و بياكلوا و يشربوا - اللهم لا حسد - وجدوا إن فيه نوع من الإلتهاب الكبدي سببه إدمان الكحول - أعوذ بالله - و ان الالتهاب ده بيؤدي في النهاية لتليف بالكبد و في النهاية لفشل في الكبد و بيضطروا في النهاية لعمل زراعة كبد و ده بيكلفهم كتييير جدا لأنهم - يااااااي بردو - عندهم تأمين صحي محترم و كل حاجة على حساب الدولة .
المهم مالناش دعوة ببتوع الكحول دول ربنا يهديهم بس العلماء هناك بقى من كتر فراغهم ده إكتشفوا ان فيه نوع تاني من الالتهاب في الكبد شبه الإلتهاب الكبدي بتاع الكحول بالظبط من ناحية شكل الخلايا و المشاكل المترتبة عليه و وجدوا ان سببه هو " إلتهاب الكبد الدهني " و ده بجد فعلا و حقيقي التحدي الجديد لأطباء الكبد و الجهاز الهضمي في العالم بعد هوجة فيروس سي دي ما تعدي و تخلص يعني . و بدأت بالفعل من فترة المؤتمرات و الأبحاث تشتغل - بس احنا مالناش دعوة يا جماعة خلونا جمب الحيطة .
ده بقى مش عند كل الناس اللي عندهم الأسباب اللي فاتت . . يعني إيه ؟؟ .
يعني فيه ناس عندها شوية ترسيب دهون " steatosis " بنشوفه في السونار أو في الرنين المغناطيسي بس معندهاش التهاب دهني أو خلل في أنزيمات الكبد .
( الحقيقة علشان نفهم موضوع إنزيمات الكبد دي و ليه بنعملها هيا عبارة عن مواد موجودة جوة خلايا الكبد فلما بيحصل التهاب و خلايا الكبد دي بتتكسر بتطلع الأنزيمات دي بره في الدورة الدموية و بتطلع عالية في التحاليل أيا كان سبب الإلتهاب بقى فيروس أو التهاب دهني أو أي حاجة . ده علشان نفهم بس . أنا عايز كل الناس تفهم و الله 😊 ) .
طيب إيه بقى أعراضه :-
الحقيقة هو في حد ذاته ملوش أي اعراض نقدر نشخصه بيها - شوفتوا الغلب اللي احنا فيه 😁 - يعني شوية هبوط لا خمول لا . . . شوية كلام فارغ يعني كل اللي بنحاول نعمله كأطباء يعني اننا بنضرب الودع و نبخر العيان كده و نقول له رقيتك بالحنجل و المنجل و الشبشب و الصندل و نشخصه. 😂😂 .
أنا بهرج طبعا مفيش صنادل و لا حاجة خالص لأنها غليت هيا كمان 😆 .
الأعراض بتظهر بقى لما يحصل تليف و يبدأ الكبد ينهار و يخصل فشل في الكبد لا قدر الله .
بس فاكرين الأسباب اللي قلنا عليها هيا دي اللي بتدلنا او بتخلينا نشك في التشخيص يعني لو عيان عنده سكر من النوع التاني أو عنده نقص في هرمون الغدة الدرقية أو كلبوووظ جدا و عنده بحيرة دهون في منطقة البطن فبنبدأ نتوغوش و نشك بقى وعينينا تلمع و نقول وجدتها 😂 و نطلع نجري بقى و بتاع 😀😀 . نبص عليه بالسونار نلاقيه فاتح شويتين نقول أيووووه هو ده نقوم بقى عاملين تحاليل أنزيمات كبد و دهون و كولستيرول نلاقيهم عاليين نروح طالبينله رنين مغناطيسي على الكبد من غير صبغة - و ساعات مبنطلبش - بس ده أدق حاجة بتأكدلنا الموضوع ده و كمان ممكن نعمل فيبروسكان كبديل للعينة الكبدية اللي هيا كانت الركن الأساسي في التشخيص قبل كده .
كده أنا غششتكوا التحاليل و الفحوصات اللي بنعملها فهنعدي النقطة دي لأني طولت عليكوا أوي و إيدي كمان وجعتني من الكتابة .
طيب ايه مشاكله :-
مشاكله إنه بيعمل إلتهاب كبدي و تليف كبد و فشل كبدي و ممكن يؤدي إلى أورام بالكبد لا قدر الله زيه زي اللي عنه فيروس كبدي B أو C بالظبط أو أي سبب تاني للتليف يعني و علشان تعرفوا حجم المشكلة هقولكوا ان إلتهاب الكبد الدهني ده تاني أكتر سبب لزراعة الكبد في أمريكا بعد فيروس C . متخيلين 😯😯 .
يعني إنسان طبيعي ربنا معافيه من فيروسات الكبد و مبيشربش كحول و لا أي حاجة يسيب نفسه يجيله التهاب كبدي و تليف و فشل في الكبد بل و أورام كمان علشان مش قادر يستغنى عن طبق الفتة باللحمة الضاني اللي بيضربه كل يوم . 😋😏 . على وضعك يا وحش 💪💪 بس اشرب بقى .
طيب إيه العلاج :-
الحقيقة ده من الأمراض اللي بينطبق عليها كلمة " الوقاية خير من العلاج حرفيا "
لأنه حتى هذه اللحظة لم يثبت أن أي علاج تم استخدامه من قبل الأطباء قد أظهر نتائج مبهرة في الموضوع ده و كلها تجارب . ☝☝ لكن كلنا عارفين ان كل حاجة في الطب بتبدأ كده بكرة يكتشفوا علاجه و احنا قاعدين و يجربوه و احنا قاعدين و بعدين يبعتوهولنا و نستخدمه و يجيب نتيجة و نقووووول الللللله ده جميييييل بردو و احنا قاعدين 😂😂.
-الخلاصة في البعد عن المسببات يعني علاج السكر و الضغط و الكولستيرول و التحكم الجيد فيهم ،
-علاج الغدة الدرقية و النخامية
-علاج السمنة المفرطة و تراكم الدهون في منطقة البطن .
و فيه بعض العلاجات البسيطة اللي ممكن نضيفها و تساعد الموضوع ده .
أخيرا أحب أقولكوا محدش أبدا يستهين بكلمة عندي شوية دهون على الكبد مش مأثرين عليا فحاجة و أنا زي الحصان . لا يا حبيبي حضرتك مريض و محتاج متابعة و محتاج تاخد بالك من نفسك .
بس خلاص أرجو إني مكونش طولت عليكوا و أكون قدرت ألخصلكوا الموضوع إلى حد ما .
و الله من وراء القصد و هو يهدي السبيل
المصدر د محمد الرزاقى
تم اضافة الموضوع بواسطة : Beso Mustafa
التحميل بصيغة ملف Word
التحميل بصيغة ملف PDF
تقييم الموضوع
شارك الموضوع