اعمل ايه للاطفال فى الجو التلج ده

 العيال كلها سقعانه وبردانه والجو تلج.

مهم بقي ياخدوا سوائل دافيه ،وفيتامين سي اللي موجود في البرتقال واليوسفي والليمون ،المناعه تتحسن ويعرفوا يتعاملوا في الجو دا.. 

العيال الصغيره اقل من ٦ شهور منتظمين علي فيتامين د اربع نقط يوميا اوعي تطنشيه ،ويرضع كويس ..

وعلي فكره مهم جدا تهويه الغرف من وقت للتاني ،ولو في شويه شمس ياريت ،دا لو في بقي.

الوقايه مهمه جدا ،وعشان كدا بلاش الطفل اللي تعبان يختلط باخوته قدر المستطاع.. 

الاطفال اللي عندهم حساسية انف وصدر  ينتظموا علي العلاج وبلاش اي تهاون ،العمليه مش ناقصة

بابا الجميل اللي بيدخن ليل نهار بلاش اللي يسترك العيال ممكن تدخل في ادوار كحه متكرره ،واحنا في ايدينا نمنع الموضوع من البداية

متنسيش أن اي حراره مبتنزلش او كحه مبتنيمش الواد ، او ترجيع مستمر او اسهال حاد كل دول حاجات لازم فيها الفحص.

انما الخنفره البسيطه والكحه الخفيفه والحراره اللي نزلت بالخافض تتعاملي معها في البيت عادي.

يوما جميلا ،مع شوربه العدس السخنه والمحشي الملهلب