ازاى ازرع الثقة فى الطفل

بيجى الطفل دنيتنا وقلبنا بيطير من الفرحه ...ملاك جه ودخل حياتنا ويوم ورا يوم الملاك الصغير بيكبر وبيبدأ يتعلم الكلام وبيدأ يسألنى انا ومن خلالى انا بيبدأ يعرف ويتعلم ...بيكبر ابنى وبتبدأ الاسئله اللى ملهاش نهايه ...سؤال عن كل شى وسؤال فى كل حاجه ؟
بعيش مع طفلى ومطلوب منى الاجابه طول الوقت ...كلام ما بينتهيش وامهات تصرخ وتقول بس كفاااااااايه رغى ...وامهات تقوله معرفش متسألنيش تانى ...وامهات تقوله افصل بقا انا صدعت ...وام تقول اخرس شويه ...وبين الصداع وبين الدوشه وبين الهروب من الطفل بيفضل جوه رأس الطفل الف سؤال وسؤال ...حتى السؤال اللى احنا نفسنا فى يوم سألناه ومحدش جاوبنا ...ربنا جه ازاى ؟ ربنا شكله ايه ؟ 

اسئله ورا اسئله وكلام ورا كلام وانا كأم قدامى حل من اتنين اما انى استغل الكلام ده وانمى مهاراته اما اقوله اخرس صدعت نفوخى وازعق واكتمه 

وكل حل وليه طريق وانا كأم اختارت حل انى استغل الكلام الكتير وسيله لتنميه المهارات 

بقيت اشوف الكلام ده عند الاطفال زى الطاقه والطاقه ديه لازم تخرج فى شى فبدل ما اسيب طفلى يتكلم فى اى شى ...اوجه انا كلامه فى موضوع معين واخليه يتكلم فيه 

هقولكم تجربتى انا وانا عملت ايه 

بنتى ماشاء الله عليها من النوع اللى بعض الناس بتوصفه بالرغى لكن انا كنت دايما بشوف ان ده ذكاء بس كنت ساعات بفرفر من ذكائها الكلامى 😂
وبقيت بشوف ان هى جواها طاقه كلام لو مخرجتهاش فى شى مفيد هتخرج على دماغى انا 😂😂

كنت بجى اسألها عملتى ايه فى المدرسه النهارده ويومك كان عامل ازاى ؟ والسؤال ده امهات كتير بتشوفه سؤال عادى اجابته لازم تكون الحمدلله كله كويس وخلاص لو الطفل قال اكتر من كده يبقى فى نظرها رغاى ..بس السؤال ده لما اسأله لبنتى او ابنى ويفضلوا يتكلموا على اللى عملوه بيربى الطفل من صغره انه يتكلم عن نفسه ويعرف يعبر عن اللى بيحصله ومع الوقت يبقى بيكلم زى الكبار وواعى بكل كلمه 
كنت بستغل نقطه انها عايزه تتكلم واقولها تعالى نذاكر انا وانتى بس انتى الاول ذاكرى الدرس وافهميه كويس وانا بعد كده هقعد قدامى وانتى تبقى الميس وتشرحى ليا ...اشوف بقا انتى مدرسه كويسه وهتفهمينى ولا لا  واسبها تشرح ليا اللى ذاكرته ووتقمص دور مدرستها 

اقولها انا اللى على طول بحكى ليكى الحكايات احكى انتى بقا ليا حكايه وفى الاول الحدوته والحكايه مكنتش بفهمها بس كنت بعمل نفسى فاهمه عشان اديها دافع واسيب الخيال عندها يكبر 
كنت بقولها اقعدى الاول مع نفسك ورتبى الحكايه وبعدين احكى ليا 

لحد مابقت بتجيب ورق وتكتب وترسم فيه حكايات وتيجى تقرأ ليا وتفرجنى 

ولما خيالها يقف ومايبقاش عندها حاجات تحكيها كنت اقولها تعالى نتفرج على قصص النساء هى بتحبها جدا جدا جدا وبعد ما تتفرج اقولها اسم من اسماء النساء واعمل نفسى مش فاكره قصتها واسبها تحكى رغم انى ممكن اكون عارفه بس بسبها تتكلم وتحكى ليا 

اسألها استفادت ايه من القصه واسمع كلامها واناقشها 
لما تسألنى سؤال انا معرفش اجابته اصلا بقولها بكل صراحه معرفش وتعالى انا وانتى ندور ونعمل بحث ونعرف سوى 

بقولها سجلى موضوع واتكلمى فيه زى المذيعه وتمسك المايك وتقعد تسجل وتتكلم عن موضوع متقمصه دور منى الشاذلى 

اطلب منها تساعدنى فى المطبخ واسبها تحكى مواصفات الاكل وتتقمص دور الشيف شربينى 😂
بخليها وبعلمها تعمل بعض المهام ...زى غسل الحوض ...غسل الحمام ...غسل اطباق ...تغسل شراب ..تغسل غيارها الداخلى ...تعمل لينا سندوتشات بافكارها ....تعمل لينا لبن بالشيكولاته ...ترسم ...تتفرج على افلام تعليميه ...اسألها عن رأيها فى شى خاص بيا ...اخد رأيها فى شى ...اسألها نفسك تطلعى ايه واقولها تعالى نقرأ شروط المهنه ديه ايه ...اسألها هتعمل ايه بالمصروف بتاعها اللى بتحوشه وبنسى خالص انى بتكلم مع طفله وبلاقى اجدع اخت وصاحبه وام كمان وقت تعبى ووقت ما عرفت معنى العجز حمدت ربنا ان عمرى مكنت بشوف كلام بنتى رغى وانى مكنتش بشوفها صغيره من وهى لسه مولوده ...دايما كنت ومازالت بشوفها كبيره فى جسم صغير ووقت تعبى هى عرفتنى انها كبيره بفعلها ...استغلى طاقه اولادك وخليها زى البذور اللى بتحطيها فى ارض تطويرهم وتنميتهم 

هقولكم موقف حصل معايا اول ما بنتى اتولدت واول مره اخرج بيها فى الشارع كنت خايفه عليها من نفسى ومن ابوها ومن اى شى 

كان عندى حاله هسهس وبجد كنت كل دقيقه اشوفها بتتنفس ولا لا 

تقريبا مسبتش حد الا لما اتخانقت معاه عشان عايز يشلها كنت بحضنها وممنوع اى حد يقرب من بنتى والشيطان كان بيلعب بيا الكوره ...لحد ما ربنا سخر ليا اللى علمنى وعرفنى وفهمنى ازاى اتعامل مع بنتى...اتسألت وقتها انتى بتحبى بنتك وخايفه عليها ؟ 

قولت بحبها جدا وبخاف عليها اوى
طيب لما تعوديها انك بتعملى ليها كل شى وانتى اللى بتأكليها بايدك وانتى اللى بتشليها خايفه تقع تتعور وانتى اللى بتتكلمى بدالها وبتعملى كل شى بدالها لو بعدتى عنها هتعيش فالدنيا ازاى ؟

وقتها سمعت السؤال ده وكان اول مره افكر فى حال بنتى وانا مش معاها واد ايه فى ناس بتضيع لما الاب او الام تبعد بسبب وفاه او باى سبب 

بدأت اتعامل مع بنتى معامله الحقيقه انى مش هعيش لها مدى الحياه ...فلازم اربيها انها تعرف تعبر عن نفسك وتعرف تدافع عن نفسها وتعرف تشيل المسؤليه وتعرف تعيش حياتها وتنجح فى اى مجال تختاروه 

بدأت اربيها على انها تعتمد على نفسها وبقيت اعلمها ازاى تاخد قرار وازاى تتحمل نتيجه اختيارها واللى كنت بقول عنه زمان رغى اكتشفت انه دليل ان شخصيتها بتقوى وبتتعلم وبتتطور ...واهم شى اتعلمته انى مقولش ابدا على ابنى اى كلمه سلبيه ولا اقول رغاى ولا غبى ولا اى كلام فى اهانه ولازم اعرف واحمد ربنا ان عندى معجزه ومشروع نجاح وروح جعلنى ربنا المسؤله عنها مش اللى بهينها وبقلل منها ...ربى عيالك من صغرهم انهم يكونوا اطفال بس رجاله 😍😍

Samar Moustafa Monday, 24 12 2018 Childrens Wtached : 466

تابعنا على فيسبوك
Related Posts
More Posts